Помалите населени места според Елена Гижаровска, имаат проблем со дежурни аптеки. Таа тоа го тврди откако се обидела да пронајде една во Дојран и околината, откако нејзиното дете качило температура. Со статус на фејсбук реагира, а нејзиниот пост масовно се споделува на социјалните мрежи.
„Замислете вака: детето ви добива температура во сред ноќ. Се наоѓате во Дојран. Ви треба аптека.
Најблиската дежурна?
Во Скопје. 180 км одалечена.
Да, да – 180 км до најблиската дежурна аптека од Дојран.
Според Google Maps, има една аптека 24/7 во Струмица…
Само што е затворена пред 4-5 години. Но нема врска, барем виртуелно постои, нели?
Очигледно, децата надвор од Скопје не се разболуваат навечер.
Или можеби се очекува да се телепортираат?
Или пак температурата да почека до утре, кога ќе се отворат аптеките?
Навистина не ми е јасно како живеат луѓето во овие места, особено со мали деца.
Што треба да направат за да добијат основна здравствена помош после 8 часот навечер?
Ова не само што е срамота — ова е апсурд.
Добредојдовте во реалноста на рурална Македонија: каде што географијата решава дали твоето дете ќе добие здравствена помош или не“, напиша таа.
